2 Corinthians 2

1Nani ma luto keheli'ohuna. Keke'i lilana nasana li huto hu lepi lalugihe luto kehelugo keta nebesigo lenalitoga mebilube luto komopa'nitu lu laga hu'ohube. 2Nani'ni keke'i luse nasana lepilenogo'ni mone kiyi'agi komopa'nigu le'mo bati hi netalabe? Lenalitinisigo nehabe komopatinigu keheli sibina hinogo ya suhi mehilube'mu hube. 3To lenalitini ana'ina lilata hi'ahana le'mo fe lilabe luto fayaha nasana koyapa'i koyoto lepi'ohunamo ni'ibe. Lenali ya hilenogo nani lenalitoga bugo komopa'nigu le'mo bati hi nete'ahana aku'i komopa'nigu laga mehilina nasana lolo hi nete lalabe luto ya'ma ya hu'ohunamo ni'ibe. Laliti'mu ya'ma luto nokehelube. Nani komopa'nigu negelo bise'na kehelutita komopatinigu lenegelo bise'na li huto hu lepilibe. 4To komopa'nigu keheli sibina hu'ohube, to komopa'nigu hepuhi lago lenali kumu yibi sipi huto fayahi ya'ma koyo lepi'ohuna to komopatini le'mo sibina hilube luto ni'igopa komopa'nigu lenali kumu ya'ma amuya moloto nohube yamofihi hapa'a lenelepilube luto ya'ma ana fayahi koyo'ohuna yabe.

Foipa foya lilata bomofihi kolotanana'a li he'mi etalana ka'a

5Bo mone kumu luto fayahi koyo'ohuna ai ya'ma komopatigu laga mehina nasana li'ehina ya'ma nanigo'i lolo mehu netabe. Lenalitoga luga'a hiti komopa'nigu laga mehinana li'ahanamo ni'ibe. Li nupa linogo'ni ya'ma botoga keta hu lalibe luto asaga bona'i hiti yamofihi lolo hu leto'ehinamo ni'ibe luto melu'ohube. 6lenali asaga'magita osahi emite ana'ina le'mo fe lite lolo hilana ya'ma anasilo su halube'mu hibe. 7Yatai ya'ma boya komopa'agu sibina hinogo mono'i he'mi su ho lalibe lite foipana'a pa so etete le'mo bati hilo. 8Ya hu'ehina'mu ya'ma lenemehi emite komopatinimofihi hapa'a lepilabe luto lenegekesa lito lenoloka nohobe. 9Nani ma luto le'mo bati hulata nasana'mu luto yata'a fayahi koyoto lepi'ohunamo ya'ma ka'ni kehelilafihe luto yamofihi hapa'a huto hilibe luto fi taga hu lepoloto koyoto lepi'ohunamo ni'ibe. 10Lenali bo mone'mofihi foipana'a li pa so etelago nani ana huto li pa so etolata nohube. Ai'a foipana'a lu huto hu'ehina ya'ma li huto hu neto'ehina ni'igo ya'ma pa nosobe. Ya hu'ehina lenali kumu kehelito Kilisitohi bulo ya'ma 11Satau ai fi taga hu letoto lebe ligi lalibe luto foipana he'milata nohube. Satau ya'ma ana'ina lolo hu letalube luto kehelilata nohina'a akeheli su ho'ohune.

Polu Toloasi hepato nohuto ekesa loe lae hu'ehina ka'a

12Nani Kilisitohi ka lamana'a lu yege halube luto Toloasi hepatoga nonehetugo Hu'mau ai'a kapo li hokolo hu netago keheliloto'ni bo mone nalalu'nifu Taitasiu ai meago yabe luto sa sa huloto'ni negekesa loe lae higo ana hepato bona'magi nayahi epito he'mi epoloto Masetonia kapoga buto sa hilube luto bu'ohuna yabe.

Kilisitohi ka'a lu huto huse'a nohune

14Akae. Hu'mamofihi legelo bi emilune. Hu'mau ai'a Kilisitotoga lele'mo hepilago ai foipana he'mi leto'ehina'mu fokehi hoto kanipo filata nohuto'a megesa'alo lele'mo leli'ali nohina yabe. Ya higo lali noto notoga buto ka'a lu noepinogo ana kagauba hetofa tu'a tili tele huto nobina suhi huto noto noto i futili huto nobibe. Ya'mu lali Hu'mamofihi keke'i lu etoto legelo bi emilune. 15Lali Kilisitohi tu'a lamana'a legi huto nohutita Hu'mamofihi kuguhi koyo emilago bona'i enubuto bito noenele'mana bona'i hiti to yabalugu limilata nehana bona'i hiti ya'ma tu'a enoholata nohibe. 16Foipanamofihi nasana lolo hi'ahana enali tu nebite fililata nehana nasanamofihi tuguma'i enahago fililata nehabe. To lubuto bi'ehina bona'a lali tu nebite minolatanamofihi tu'a loholoto lele'mo mopo higo kosaba lemehiti lolo huto minolata nohune. Foya yamofihi asaga bona'i enali'ani amuya'aniloti bati mehu'ehigo aku'i laliti ya'ma lilune. 17Lali bona'i luga'amagi hite melete nehana'a nehana ya suhi lolo hulata menohune. Bona'i luga'a asagatoga Hu'mamofihi ka'amu kehelilago kefahi li huto hu epilina nasana lolo hulago foya'a li etelata nehanaya lali ya'ma komopati lamana hinogo minaluta Hu'mamofihi bulo buto Kilisitotoga i hepiloto mono ka'a lulata nohune.
Copyright information for BEF